Thursday, September 11, 2008

تحديث هام

معلش حبيت انزل التحديث فى بوست منفصل علشان يظهر على الريدر للناس
النهارده روحت انا و آبى مستشفى الاطفال
و شوفنا حالات الاطفال فى المستشفى الموجودين فى اقسام جراحة القلب و المخ و الاعصاب و الفشل الكلوى و الرعاية
طبعا مش هقول على الحالات اد ايه هى صعبة لان ده هتشوفوه بعنيكم
لكن المهم انكم تعرفوا هم محتاجين ايه
اولا
فى بعض الادوية فيها نقص فى المستشفى و يمكن كمان قص فى السوق كله
و منها ادوية اسعارها لا تتعدى الخمسة جنيه
هقولكم على اسمائها
بس المطلوب ان اللى يجيب منها يحاول بدل ما يجيب انواع مختلفة يفضل انه يجيب كمية من نوع او اتنين
كل واحد يدور فى الصيدليات اللى جنب بيته او فى منطقته
الادوية هى
حقن zovirax 250 mg or 500 mg
diflucan حقن
L carnitine cap
ventolin inhalar
meronem 1/2 gm or 1 gm حقن
sodium bicarsbonate 8.4% امبول
rimactan syrup
Indral amp
امبول nor-adrenaline
لو فى اى لغبطة فى الهجاء اعذرونى لان انتم عارفين خط الدكاترة بس اكيد الصيدلى هيعرف
ده بالنسبة للادوية واللى هتدخل صيدلية المستشفى
و اللى هيقدر يوفر الدوا بعد الميعاد معندناش مشكلة اننا ناخده منه و نوصله للمستشفى بعد كده
اما عن اللى يحب يجيب هدايا للاطفال نفسهم
فالاطفال حوالى 50 طفل
اعمارهم من سن سنة لحد 6 سنين
و فى خمس اولاد عمرهم 12 سنة
و بلاش تحتاروا فى ان اللبس لولد و لا بنت
حاولوا بقدر الامكان ان اللبس يكون ينفع للاتنين
لان بصراحة فى اطفال عاملة عمليات فى المخ و حالقين شعرهم و مقدرناش نحدد هم ولاد ولا بنات
و اللعب نفس الشىء لان السن لاطفال صغيرة و ممكن تشتروا لعب تنفع للجنسين
اما اللى يحب انه يتبرع بمبلغ كعيدية لهم فالافضل انه يقسم المبلغ فى اظرف و يوزعها على كذا طفل
المستشفى هى ابو الريش اليابانى قريبة جدا من محطة السيدة زينب بتاعت مترو الانفاق
اللى ينزل من المحطة ينزل ناحية القصر العينى
و يتجه من المحطة شمال فى اول يمين هيلاقى المستشفى على شماله على طول جنب كوبرى
و تذكروا ان شهر رمضان ، شهر الصيام والقيام ، والبرّ والإحسان
يقول المصطفى ـ صلى الله عليه وسلم ـ :( أفضل الصدقة ، صدقة في رمضان) رواه البيهقى

وانطلاقا من قول النبى صلى الله عليه وسلم
عَن النُّعْمَانِ بْنِ بَشِيرٍ قَالَ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ: ( مَثَلُ الْمُؤْمِنِينَ فِي تَوَادِّهِمْ وَتَرَاحُمِهِمْ وَتَعَاطُفِهِمْ مَثَلُ الْجَسَدِ؛ إِذَا اشْتَكَى مِنْهُ عُضْوٌ تَدَاعَى لَهُ سَائِرُ الْجَسَدِ بِالسَّهَرِ وَالْحُمَّى )(1).

خالينا نرسم بسمة امل للاطفال المرضى الموجودين هناك ونيتنا كلنا ادخال السرور على قلوب الاطفال
امتثالا لقول النبى عليه الصلاة والسلام
(من ادخل على اهل بيت من المسلمين سرورا لم يرض الله له ثوابا دون الجنه )

فنيتنا كلنا اننا ندخل السرور عليهم ده علشان ربنا يتقبل مننا وجهدنا ميروحش هدر وكل سنة وانتوا طيبين وللخير فاعلين وللجنة ساكنين
اى سؤال او استفسار انا تحت امركم

20 comments:

Empress appy said...

انا عملت التحديث عندي وعلى بيكيا
ابقى شوفى الحروف انا كمان مش عارفه صح ولا غلط ربنا يسهل بس الدكاتره بتعرف
ربنا يكرمك يا رب

قوس قزح said...

ان شاء الله هيكون سهل على اى صيدلى انه يعرف اسم الدوا الصح
الخط وحش اوى :(

ربنا يسهل

(احمد سكر ) said...

بجد خلص الكلام

وان شاء كلنا للفعل متجهين

جزيتم كل الخير

بجد الواحد مش عارف يقولكم ايه

احمد

Gannah said...

داليا
جزاكم الله خيرا
أنا صححت الاسماءاللى متأكده من تصحيحها

zovirax 250 mg or 500 mg
ventolin inhaler
meronem 1/2 gm or 1 gm
sodium bicarbonate 8.4%
remactan syrup
Indral amp
امبول nor adrenaline

ان شاء الله النهاردة هدور عليهم وربنا يسهل
ربنا يكرمكم انت وآبى وكل اللى شارك
تحياتى

قوس قزح said...

احمد سكر

جزاك الله خير
الخير انتم السبب فيه احنا بس بنذكر

ربنا يوفقنا يا احمد فى اليوم ده
لان فعلا الولاد محتاجين حتى لو كلمة سلامتكم

تحياتى

همس الاحباب said...

اوك
علم وجارى التنفيذ
ربنا يجعله فى ميزان حسناتكم
تحياتى

Diyaa' said...

ربنا يكرمكم ويكتر من أمثالكم :)
وربنا معاهم بجد ويا ريت لو نعرف أي صحفيين أو أي حد يوصل لبرنامج زي العاشرة مساء أو البيت بيتك عشان يتعمل حملة بخصوص الأطفال البريئة اللي بتتولد تتعذب ويا ريتهم حتي لاقيين العلاج والرعاية..مفيش أعتراض علي قضاء ربنا ولكن الإعتراض علي تجاهل الأطفال البريئة دي في محنتهم
ربنا يصبر أهلهم ويكون في عونهم

جزاكي الله كل خير :)

قوس قزح said...

جنة

جزاكى الله خير
انا غيرت اللى قلتى عليه

و هبقى اسال على الباقى و اتاكد انه صح


شكرا لكى

قوس قزح said...

همس الاحباب

فى انتظارك يا ريس :)

قوس قزح said...

ضياء

تصدق انهم فعلا فى المستشفى مجهزين للقاء على المحور فى برنامج 90 دقيقة
و ربنا يكرم و الناس تساعد اكتر

و ربنا يشفيهم يارب

جزانا و اياكم

Bob said...

ربنا معاكم

كـــيــــــــارا said...

والله ربنا يجعله من ميزان حساناتكم

وكمان ياجماعه في ناس محتاجه للدم ومرضي في القصر العيني لازم مش نناسهم

اهو ده عيبه said...

ازيك يادوللى وكل سنة وانتى طيبة
بصى دى بعض الادوية اللى قدرت اعرف سعرها
zovirax 250 سعره 27.50 ج
ventolin inhcler سعره 13 ج
meronem1/2 gm سعره 102.25 ج
remactan سعره 6.50 ج
indral omp ده بقى صعب تلاقوه بس ربنا ييسر
nor adrenaline ده موجود فى المستشفيات مش الصيدليات
وربنا يقدركم على فعل الخير

لؤلؤة الاسلام said...

ما شاء الله
اختى قوس قزح
حزاك الله خير الجزاء لاهتمامك بهؤلاء المرضى

و تقبل الله منا و منكم في رمضان ان شاء الله
بس بقى انوى قبل ما تروحى علشان تاخدى الاجر كامل ان شاء الله

و تحياااااتى
رمضان كريم

كيكى عوووووو said...

فرافيور
انا
جاااااااااااااااااااااى
عووووووووووووووووووووووو

حنين القلب said...

كان نفسى اكون معاكم اوى
ربنا يجعل اليوم ده فى ميزان حسناتكم

Ahmed Al-Sabbagh said...

ربنا يكرمك انتى وابى
والله مش عارفين نرد تعبكم ونبلكم ده
ربنا يجازيكم خير

عايش... ولكن !!!! said...

ربنا يجازيكوا خير ويجعله فى مزان حسناتكوا

عاشقة القمر said...

ربنا يجعل في ميزان حسناتكم ربنا يساعدكم لي عمل الخير

LoNdOn GaL said...

السلام علكم
شفت هالبلوج بالصدفة ويا ريت اقدر اساعد
انا نازلة مصر عن قريب
اذا في اي دواء غير متوفر او غالي في مصر فانا حاضرة
ما عليكم الا ان تعطوني الاسامي

تحياتي