اولا

كل سنة وانتم بخير

و عيد اضحى سعيد على كل مسلم

ثانيا

انا بشكر كل اللى علق عندى على البوست اللى فات و بقولهم جزاكم الله كل خير وان الحمدلله محدش قال عليا انا شخصيا حاجة و ان يوم البؤجة كان يوم ناجح جدا و جمعنا شنط كتير و مبالغ تكفى لشراء بطاطين للناس ده غير ان فى ناس جديدة شاركت معنا و ده معناه ان المشاركات كل مرة بتزيد و ان حتى التجمع بعد البؤجة كان جميل و الناس كانت مبسوطة و فرحانة باللقاء ده و ان كان سبب زعلى هو انى عرفت ان بعض المدونين بيتكلموا على مدونين بشكل مش كويس بالرغم من وجود صداقة بينهم و ده طبعا ضايقنى جدا لان احنا ناس كبيرة و مينفعش نعمل كده خصوصا ان كانت لقاءتنا خيرية او ثقافية ده طبعا غير الشتايم اللى كلنا بنشوفها فى البلوجات .. و معلش اعذرونى الفترة الجاية عن غيابى و ده مالوش علاقة خالص بشعورى ده لانها كانت مجرد حيرة و الحمدلله كلامكم و رغبتكم حسمت الحيرة دى .. بس كل الحكاية انى محتاجة اعيد ترتيب اوراقى و فى نفس الوقت فى اجازات و بكون مشغولة فى الوقت ده من السنة لان كل الاقارب اللى فى دول اوروبية او امريكا بينزلوا مصر علشان هم هناك اجازة

و خيخة ان شاء الله فى الفترة دى ممكن تعمل لقاء او اتنين ربنا يجازيها خير يا رب

ثالثا

و ده الاهم

هى نصيحة لكل ولد و بنت من المدونيين

كل شخص بنعرفه من ورا شاشة الكمبيوتر ممكن جدا يكون غير الحقيقة سوا فى افكاره او مبادئه او حتى صورته اللى رسمنهاله فى خيالنا

و من هنا لازم تكون فى حدود تتحط بينكم فى التعامل و مينفعش ابدا نكون قريبين و اصدقاء من غير عشرة و معاملة واقعية

لما نتقابل فى الواقع اتعاملوا كأن دى اول مرة تتعرفوا على بعض و يكون جواكم كل الحريص اللى بيكون مع اى حد غريب و بعد عدة لقاءات و معاملات واقعية تقدروا تحكموا الشخص ده ينفع يكون صديق او لا

لازم نتعلم كلنا ازاى نفصل بين شخصية المدون و الشخصية الحقيقية

سواء الفصل مع نفسك او مع غيرك

و عمر الصداقة ما كان معناها ان الواحد يكون مجامل و بيتكلم حلو و دمه خفيف .. الصفات دى هنلاقيها فى اغلب الناس .. لكن الصداقة معناها اكبر من كده بكتير و يمكن كمان يكون فعلا اقرب حد لنا هو الشخص اللى بيكون صريح و بيقولنا عيوبنا قبل مميزتنا

اهم حاجة اننا لازم نعرف ان شخصية المدون مش شرط ابدا انها تكون دى الشخصية الحقيقية و لما نتقابل مع الحقيقية لازم نبدا فى التعامل من الصفر

و اخيرا

اتمنى كل شخص بقصد او من غير قصد ضايق حد او قال عليه كلمة يحاول يفكر تانى و يعرف انه غلطان و يحاول يصحح غلطه ده بالطريقة اللى ترضى الشخص اللى ضايقه

و ربنا يهدى الجميع للصواب

و كل سنة وانتم بخير