Thursday, January 8, 2009

زيارة الهلال و معهد ناصر

امبارح كانت زيارة المصابين من اهل غزة و كنا ناويين نروح الهلال الاحمر و بعدها البعض كان هيروح النقابة و لكن لان عدد الحالات كان قليل فى الهلال الاحمر قررنا اننا نروح معهد ناصر بعد كده علشان يستفيد الناس بالتبرعات اللى كانت ما شاء الله كتير من تبرعات مالية و ملابس و عصائر .. و كان البعض عنده استعداد للتبرع بالدم و لكن للاسف قالوا ان التبرع فى مكان تانى
الناس اللى جات حوالى حاجة و عشرين .. و طبعا لسف معرفش كل الاسماء بس هقول بعضهم ايناس مدونة
رضوي مش عارفة الدنيا وخداني علي فين
عرفة الاسيوطى
ايمان ..سوبيا
لو نسيت حد ياريت تفكرونى به
اما عن الفلسطينين ففى بعض منهم نفسيته تعبانة بسبب حالات الاستشهاد اللى بتحصل كل يوم و البعض التانى تحس انه خلاص اتعود على انه يشوف الدم و القتل كل يوم .. ربنا معهم بجد
بس الاهم من ده ان كلهم كاوا فرحانين اوى بالمصريين و فرحنين اننا بنروح نطمن عليهم و ندعى لهم و نقولهم اننا معهم بقلوبنا على الاقل
و فى معهد ناصر بالرغم من ان اليوم اجازة و كتير ممكن يستغلوه فى خروجة او فسحة لكن شوفت اسرة كتير جاية تزورهم و فى منهم جايبين زيارة و منهم لا ..لان الهدف هو اننا نقولهم احنا معاكم و مش ناسينكم
المهم اللى يحب يروح وقت ما ظروفه تسمح
الوضع هناك كالاتى :
عدد الحالات اللى فى الهلال الاحمر كانت 12 حالة و كلهم ذكور من سنة 19 سنة لسن 60
و اغلب الاصابات بتكون نتيجة قذف صاروخى و بتكون فى الارجلين و الايدين
اما معهد ناصر ففى حوالى 28 حالة سيدة و طفل و الباقى ذكور
و اعمارهم مختلفة
اعتقد ا ن افضل المساعدات لهم هى المساعدات المادية او كروت الموبايل علشان يكلموا اهلهم فى غزة
و لو حد يحب يودى ملابس او غيارات فاغلب المقاسات تكون ميديم او لارج و اغلبهم ملابس رجالة من سنة 20 لسن 40
فى كمان مستشفى فلسطين اللى فى مصر الجديدة فيها حالات محتاجة مساعدات مادية
و ربنا يتقبل منا جميعا

22 comments:

محمد حمدي said...

داليا.. .رائع انك كتبتى قايمه كامله باسماء الناس اللى حضرت التجمع لانى عاوز انزل بوست وبالصور عن الزياره لكن كنت مستنى حد يقول الاسماء كلها

بالنسبه للينك البلوج بتاعى هو
http://demaghy.blogspot.com

ياريت تحدثى البوست وتحطى اللينك مع اسمى

وبجد اليوم كان رائع ... لسه سايب وجع فى قلبى لحد النهرده

تحياتى ليكى ولكل اللى جه وكل اللى هيروح وكل الى هيساعد وحتى لكل اللى هيدعى

تحياتى

ميرا ( وومن ) said...

دودو

اليوم كان جميل وماشاء الله فعلا حاجة تفرح

ربنا يجعلة في ميزان حسنات كل اللي راح

!!! عارفة ... مش عارف ليه said...

ربنا يتقبل

وإن شاء الله في ميزان حسناتك

همس الاحباب said...

جزاكى الله خيرا
وجعله فى ميزان حسناتك
ودايما متجمعين فى الخير
تحياتى

صبرني يارب said...

ربنا يتقبل منكم يارب

اتصلت عليكى يا ست انتى ما ردتيش ليه

وحشتينى يا وحشششششششششه

هاكلمك لما اخلص طبيخ

أمل حمدي said...

جزاكم الله كل الخير

تمنيت ان اكون معكم ولكن الظروف

جعله الله في ميزان حسناتكم

سلام حبيبتي

حنين القلب said...

الله يبارك فيكم يا داليا
بجد بجد عملتوا حاجه تشرفنا كلنا

ربنا يتقبل منكم
كنت اتمنى اكون معاكم
ان شاء الله المرة الجايه
ربنا يشفيهم جميعا

عاشقة القمر said...

ربنا يجعل في ميزان حسناتكم

يجمعكم علي عمل الخير

maha zein said...

ربنا يكرمك ويعزك ويجعله في ميزان حسناتكوا
امين
وربنا ينصرهم ويعزهم

Mafrousa said...

الله عليكم الله
ربنا يبارك فيكم و يجازيكم كل الخير يارب

قوس قزح said...

محمد حمدى

و الله يا محمد فى اسماء ناس مش عارفة للاسف
و انا عملت التحديث بباقى اللينكات
و ربنا يتقبل منا ان شاء الله و يرفع عنهم

تحياتى

Anonymous said...

يارب دايما فى الخير .. الحقيقة مجموعة انسانية رائعة تفعل شيئا ..

ولو نوايا تسند الزير

تحياتى

meshmesha said...

ربنا يبارك لك يا داليا ويجعله فى ميزان حسناتك يارب

قوس قزح said...

وومن
فعلا اليوم كان جميل بمشاركتم و بالمشاعر اللى الواحد كان محتاج يحسها بأن المصريين مش مكبرين دماغهم و انهم فعلا عايزين يساعدوا اهل غزة بجد

Unknown said...

ربنا يبارك فيكى وشكرا لتواجدك
دايما سباقة للخير

عاشــــــ النقاب ـقــــة"نونو" said...

تقبل الله منا ومنكموربنا يفكعنهم وعنا يارب

دعاء مواجهات said...

ربنا يتقبل مننا يارب

ويجعله فى ميزان حسناتنا

وعاوزين بجد لقاءت الخير دى متنتهيش ابدا

تحياتى

simply me said...

جزك الله كل خير

قوس قزح said...

عارفة..مش عارف ليه

اشكرك يا وليد على دعاءك و تشجيعك
و اعمل حسابك فى اول زيارة لمصر تشارك معنا

تحياتى

قوس قزح said...

همس الاحباب

وجزاك خير يا خالد على تواجدك الدائم و عدم تاخرك عن اى مشاركة من اى نوع
تحياتى

!!! عارفة ... مش عارف ليه said...

ده أكيد يا داليا

إن شاء الله

-------------

المشكلة هنا إن المجتمع

غير المجتمع المصري

ببساطة شديدة

بجد بجد وبدون مبالغة

لازال قلبنا هو قلب الأم

يعني حكاية قلب الأمة العربية دي مش كلام فارغ

لا والله مفيش حد بيحس بهموم الأمة دي زي المصريين

حتى وإن كان انحصر الاحساس ده على المستوى الشعبي

إلا إن لازال نبض العروبة والنخوة في دمنا

شكراً جزيلاً على إعتباري واحد منكم

رغم المسافات اللي بينا

دومتي بكل خير
وليد

يا مراكبي said...

ربنا يبارك فيكم جميعا

وده مش غريب عليكم بجد

ومش أول مرة تسعوا في الخير